- 478 -

1414. Dez. 13. Liegnitz.

Die Herzoge Wenzel und Ludwig bestätigen den Gebrüdem Hezeler alle ihre Handfesten, die sie über ihre Besitzungen im liegnitzer und goldberger Weichbilde erhalten haben.

Wir Wenczlaw von gotis gnadin bischoff zu Bresslaw herczog in Slezien vnd hirre zu Legnicz bekennen vnd tun kunt vffentlich mit desim briue allin, die en seen horin ader lesen, das wir angeseen habin getrawe vnd willige dinste, die vns vfte vnd vil her Lucas, Hannos vnd Vrban Heseler, gebrudere zu Legnicz vnser libin getrawin getan habin teglichin tun vnd in czukomftigen czeiten wol tun mogin vnd sullen, dorumme so habin wir en vnd alle erin geerbin vnd elichin nochkomlingin alle vnd igliche priuilegia, hantfestin vnd briue, die sie vnd ir vorfarn obir ere gutere in den ffurstenthumen zu Legnicz vnd zum Goltberge gehat habin vnd noch habin nemlichin obir daz gancze dorff vnd gut Waldaw mit alle seinen zugehorungin, das gut Wiltschicz mit alle seinen zugehorungin, das gut Scheibansdorff mit alle seinen zugehorungen, eyn virdeteil des dorffis Wolfsdorff .mit allen seinen zugehorungin, das vorwerg Smochewicz mit alle seinen zugehorungin, die mole, die man nennet die Swerczmole vnd das vorwerg vor dem Goltberge, Kopetsch genant, mit alle seinen zugehorungin vnd andir alle ere gutere erplich adir zu wedirkawffe, welchirleie die werin, die von Peter Heselern erim vatir vnd Rulande erim vettir seligis gedechtnis an sie in den egenanten landin vnd weichbildin zu Legnicz vnd zum Goltberge komen vnd geerbit sein vornewit, confirmiret vnd bestetigit, vornewen, confirmiren vnd bestetigen en die, erin geerbin vnd alle erin nochkomlingin alz ein furste vnd rechter ordinlicher naturlicher erphirre zu Legnicz vnd zum Goltberge mit craft diz briues vnd nemlichin zugesampten leen, zu gesampter hant vnd vngesundirt, in sulchir meinunge, ab einer vndir en abeginge adir abestorbe, das sie gancz vnd gar mechticlichin an die andern vnd ere geerbin mit alle erin zugehorungin komen vnd gefallin sullin von vns vnd alle vnsern nochkomlingen, hirren zu Legnicz vnd zum Goltberge vngehindirt an arg zu habin, zubesitczin, zuvorgebin, zuvorkewffin gancz adir einez teilz, zuvorseczin vnd domete zutun vnd zulassin, alz en das allir noczlichste vnd beheiglichste gesein mag, vnd sunderlich, das wir noch vnser nochkomlingin vorbaz mee no vnd ewiclichin keinerleie ansproche habin sullin zu den gutern, die von dem egenanten Rulande erim vettir an sie bekomen vnd gestorbin sein. Auch ab sie in czukunftigin czeiten ir wesin yminer wandiln wellin mit der teilunge adir mit koste, wie das were, das sal en allin vnd erin geerbin vnschedlichin sein, iglichin an seime vnd seiner geerbin angefeile, das is von eime io an den andern komen sal, y dach so gebin wir von sunderlichin gnadin dem obgenanten hern Lucas sulche macht vnd gewalt, das her seinen dritteteil in allin obgeschrebin gutern, wen iz em zusinnen vnd wilsamen ist vngehindirt vnd nichticlichin mag vorkewffin, vorgebin, vorseczin gancz vnd gar adir eins teilcz, wen em das beheiglichin vnd beqweme sein worde noch alle seime willin vnschedlichin, dach der egenanten brudern vnd erin geerbin iglichim besundern an erin czweien teilen, also das se io bei en bleibin sullin, vnd ap her sie also in czukomftigin czeiten nicht vorkewfte noch vorgebe zu selegerethe adir worzu is were, so sollin se gancz vnd gar io bleiben vnd noch seime tode gefallin an die egenanten Hannos vnd Urban Heseler gebrudere vnd ere erbin mechticlichin vnd vngehindirt die selbin obgeschreben gutere vornewen, confirmiren vnd bestetigin wir von vnsir furstlichin macht vnd gnadin in craft diz briues in allin vnd iglichin erin, stuckin,, punctin vnd artikiln ingleichirweise vnd in allirmasse, alz ap sie alle mittenandir vnd ir iglichs besundir in desim briue begriffin vnd eigentlichin beschrebin werin nemelichin zu sulchin vngesundirtin leen, das sie io von eime an den andern vnd an ere geerbin komen vnd gefallin sullin mechticlichin, mit allin furstlichin rechtin mit obirstin vnd nedirstin gerichtin, mit allin leen, geistlich vnd werltlichin., nichtis ausgenomen, erplich vnd ewiclich zutun vnd zulassin von vns vnd vnsern nochkomlingin hirren zu Legnicz vnd zum Goltberge vngehindirt czu allin obgeschrebin vornewunge, confirmirunge vnd bestetegunge der obgeschrebin gutern vnd andern allin gutern, sie werin erplich adir zu wedirkewffe, die sie habin in vnsern egenanten landin vnd ffurstenthumen, nichtis ausgenomen, wie das namen hat, gebin wir Ludwig von den selbin gotis gnadin herczog in Slezien vnd hirre zum Brige, alz ein rechter naturlichir erbeling vnd anwarter vnd dorczu alz en vorwesir des vorgenantin landis vnd furstethumes zu Legnicz volkomlichin vnsern willin vnd gunst vnd bekennen, das alle obgeschrebene stocke vnd artikle gancz vnd gar mit vnserm wissin, rate vnd gutim willin vorschrebin vnd vorbrift sein vnd zu orkunde vnd zurechter ewigir bestetigunge allir genanten stocke, habin wir vorgenanter Wenczlaw bisschoff zu Breslaw, herczog vnd hirre zu Legnicz vnser gros ingesegil vnsers ffurstenthumes zu Legnicz, vnd wir Ludwig vorgenanter herczog zum Brige auch vnser gros ingesegil desselben vnsers ffurstenthumes zum Brige mit vnsern rechtin wissin an desin briff heissin hengin, der zu Legnicz gegebin ist an sente Lucian tage noch Crists gebort virczenhundirt jar vnd dornoch in dem virczendin jare. Dobeie seint gewest vnser libin getrawin her Peter von Landiscrone, her Nickil von Stewicz, Hannos von Langenaw, Peter Vngerotin, Hannos Hertil, Nicklaz Elle vnd Franciscus Briger thumhirre zum Brige vnser schreiber, deme desir briff befolin wart.

O. d. St. L. No. 253. Beide Siegel, wohlerhalten an Schnüren von rother Seide.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866